اسٹاف رپورٹ:پی این پی نیوز ایچ ڈی
گوجرانوالہ کی انسداد دہشت گردی عدالت نے سابق وزیر اعظم عمران خان پر وزیرآباد میں ریلی کے دوران ہونے والے قاتلانہ حملے کے کیس کا فیصلہ سنا دیا۔
عدالت نے مرکزی ملزم نوید احمد کو معظم کے قتل کے جرم میں ایک بار عمر قید دہشت گردی کا جرم ثابت ہونے پر ایک اور بار عمر قید
چار افراد کو زخمی کرنے کے جرم میں 3 سے 5 سال قید اور 5 لاکھ روپے جرمانہ کی سزا سنائی ہے۔
عدالت نے دیگر دو ملزمان طیب بٹ اور وقاص کو بری کر دیا۔
مقدمے کی سماعت کے دوران عدالت نے سابق وزیر اعظم کو 8 مرتبہ عدالت میں طلب کیا، اور اڈیالہ جیل سے ویڈیو لنک پر پیشی کا بھی حکم دیا، مگر انہوں نے بطور گواہ اپنا بیان ریکارڈ نہیں کروایا، جس پر عدالت نے ان کا حق صفائی ختم کر دیا۔
یاد رہے کہ 3 نومبر 2022 کو وزیرآباد میں لانگ مارچ کے دوران سابق وزیر اعظم عمران خان کے کنٹینر پرفائرنگ کی گئی تھی، جس میں ایک شخص جاں بحق اور عمران خان سمیت 13 افراد زخمی ہوئے تھے۔
سابق وزیر اعظم عمران خان نے حملے کا الزام رانا ثناءاللہ، شہباز شریف اور ن لیگ کی قیادت پر عائد کیا تھا۔
