سٹاف رپورٹ (تازہ اخبار ،پی این پی نیوز ایچ ڈی)
پی ٹی آئی نے آئندہ عام انتخابات ’’نظام بدلو، پاکستان بدلو‘‘ کے نعرے کے تحت لڑنے کا فیصلہ کیا ہے تاہم کہا ہے کہ اشتعال انگیزی، ریاست مخالف مہم اور لانگ مارچ کی پارٹی حمایت اور حوصلہ افزائی نہیں کرے گی۔
پی ٹی آئی کارکنوں کو بتایا گیا ہے کہ عمران خان کا وژن ہے ’’ملک میرا، فوج میری اور قوم میری‘‘۔
پی ٹی آئی کے ترجمان نے زور دے کر کہا کہ پارٹی اشتعال انگیزی، تشدد اور ریاست مخالف مہم کو واضح طور پر مسترد کرتی ہے۔
اس کے علاوہ آسٹریلیا کے ہائی کمشنر نیل ہاکنز نے پی ٹی آئی کے چیئرمین بیرسٹر گوہر علی خان سے ملاقات کی۔
اجلاس میں پی ٹی آئی رہنما بیرسٹر علی ظفر اور مرکزی سیکرٹری اطلاعات رؤف حسن نے بھی شرکت کی جس میں آئندہ عام انتخابات اور سیاسی جماعتوں کے کردار پر تبادلہ خیال کیا گیا۔
پی ٹی آئی کے انٹرا پارٹی انتخابات کے خلاف ای سی پی کی جاری سماعت اور نشان “بلے” کے اجراء میں طویل تاخیر پر بھی تبادلہ خیال کیا گیا۔
ادھر پی ٹی آئی کے بانی چیئرمین عمران خان نے کہا ہے کہ مقبوضہ کشمیر کی خصوصی حیثیت سے متعلق بھارتی سپریم کورٹ کا فیصلہ اقوام متحدہ کی سلامتی کونسل کی قراردادوں کی سراسر خلاف ورزی ہے۔
پی ٹی آئی کے میڈیا ونگ کے ذریعے شیئر کیے گئے اڈیالہ جیل سے ایک پیغام میں، عمران خان نے 5 اگست کو مقبوضہ جموں و کشمیر کی خصوصی حیثیت ختم کرنے کے بی جے پی حکومت کے ‘یکطرفہ، غیر آئینی اور غیر قانونی’ فیصلے کو برقرار رکھنے کے بھارتی سپریم کورٹ کے فیصلے پر سخت ردعمل کا اظہار کیا ہے۔
